عمان کا اجلاس سعودی عرب کی درخواست پر ملتوی کیا گیا: اسماعیل بقائی

تہران: ایرانی وزارتِ خارجہ کے ترجمان اسماعیل بقائی نے ہفتہ وار پریس بریفنگ کے دوران انکشاف کیا ہے کہ سلطنت عمان کے شہر صلالہ میں ایران اور خلیج فارس کے سات ممالک کے وزرائے خارجہ کا اہم اجلاس سعودی عرب کی باضابطہ درخواست پر ملتوی کیا گیا ہے۔

اس اعلیٰ سطحی اجلاس کا بنیادی مقصد آبنائے ہرمز اور ملحقہ سمندری شاہراہوں سے گزرنے والی تجارتی و بحری آمد و رفت کی سیکیورٹی پر تبادلہ خیال کرنا تھا۔ تاہم عمان کے وزیرِ خارجہ بدر البوسعیدی نے اجلاس کی منسوخی کا باقاعدہ اعلان کیا، جبکہ خطے کے ملک بحرین نے ایران کی شرکت کے باعث پہلے ہی اس کانفرنس کے بائیکاٹ کا اعلان کر رکھا تھا۔

ترجمان ایرانی وزارتِ خارجہ اسماعیل بقائی نے بریفنگ میں کہا کہ یہ ایک انتہائی اہم سفارتی موقع تھا جو ایران اور عمان کی مشترکہ کاوشوں سے فراہم کیا گیا تھا۔ انہوں نے افسوس کا اظہار کرتے ہوئے کہا کہ توقع تھی کہ خطے کے تمام ممالک بیرونی قوتوں کی مداخلت سے دور رہ کر اس موقع کی اہمیت اور افادیت کو سمجھیں گے۔

اسماعیل بقائی نے مزید کہا: ”تمام جائز تحفظات کے باوجود یہ ایک بہترین پلیٹ فارم تھا جہاں خطے کے ممالک اپنوں کے درمیان بیٹھ کر براہِ راست بات چیت کر سکتے تھے۔ کوئی بھی ذمہ دار فریق خطے سے باہر کی طاقتوں کے اثر و رسوخ یا غیر متعلقہ بہانوں کی بنیاد پر ایسے اہم سیکیورٹی اجلاس کا انعقاد نہ ہونا تسلیم نہیں کرے گا“۔

واضح رہے کہ عمان کے ساحلی شہر صلالہ میں ہونے والے اس اہم اجلاس کے لیے فی الوقت کسی نئی تاریخ کا طے یا اعلان نہیں کیا گیا ہے۔