نیویارک فائرنگ کا شکار ڈرائیور پاکستانی تارکین وطن دانش سرور نکلا: خاندان کی کفالت کے لیے ہفتے کے ساتوں دن کام کر رہا تھا

امریکہ کے شہر نیویارک کے علاقے بروکپین میں ڈکیتی کے دوران فائرنگ سے زخمی ہونے والے کیب ڈرائیور کی شناخت 21 سالہ پاکستانی تارکِ وطن دانش سرور کے نام سے ہوئی ہے۔

ذرائع کے مطابق دانش سرور پاکستان میں مقیم اپنے اہلخانہ کی مالی کفالت کے لیے نیویارک میں رات دن محنت کر رہا تھا اور ہفتے کے ساتوں دن کیب چلا کر روزی کما رہا تھا کہ ڈکیتی کی اس دردناک واردات کا نشانہ بن گیا۔ ملزم نے رقم لوٹنے کے بعد دانش پر سیدھی فائرنگ کی، جس کے نتیجے میں گولی ان کے چہرے پر لگی۔

دانش سرور کو علاج کے لیے فوری طور پر مقامی ہسپتال منتقل کیا گیا جہاں ڈاکٹرز کے مطابق ان کی حالت اب مستحکم ہے۔ نیویارک میں مقیم پاکستانی برادری نے اس افسوسناک واقعے پر شدید تشویش کا اظہار کرتے ہوئے مقامی انتظامیہ سے ملزم کی فوری گرفتاری اور سزا کا مطالبہ کیا ہے۔