علم اور اخلاق جارح دشمن کا ہاتھ کاٹ سکتے ہیں، ایرانی سپریم لیڈر

ایران کے سپریم لیڈر آیت اللہ علی خامنہ ای نے تاکید کی ہے کہ علم، حکمت، سائنس اور اخلاقی قدروں سے آراستہ قومیں جارح دشمن کا ہاتھ کاٹنے اور کسی بھی بیرونی مسلط کردہ خطرے کو ناکام بنانے کی مکمل صلاحیت رکھتی ہیں۔ اپنے ایک بیان میں ایرانی سپریم لیڈر نے ملک کی خود مختاری اور یکجہتی کے دفاع کے لیے سائنسی ترقی، تعلیمی بالادستی اور اخلاقی خود سازی کی کلیدی اہمیت پر زور دیا۔

آیت اللہ علی خامنہ ای کا کہنا تھا کہ جدید ترین سائنسی و تعلیمی میدان میں پیش رفت، اعلیٰ اخلاقی معیار، اور مضبوط سیاسی و مذہبی بصیرت ہی وہ حقیقی اور بنیادی طاقتیں ہیں جن کے ذریعے استکباری قوتوں اور خطے و ملک پر نظریں جمائے جارحانہ عزائم رکھنے والے دشمنوں کو مؤثر جواب دیا جا سکتا ہے۔ انہوں نے زور دیا کہ محض عسکری یا مادّی نظام ہی نہیں بلکہ علم اور اخلاقیات پر مبنی معاشرہ ہی پائیدار دفاع اور ملکی ترقی کی ضمانت بن سکتا ہے۔