نیویارک میں امریکی و ایرانی وفود کی ملاقات امریکا کے اصرار پر ہوئی، ایرانی میڈیا

ایران کے سرکاری نشریاتی ادارے اور قومی خبر رساں ایجنسی نے تصدیق کی ہے کہ ایرانی وزیرِ خارجہ عباس عراقچی اور امریکی خصوصی ایلچی اسٹیو وٹکوف کے درمیان نیویارک میں اقوامِ متحدہ کی جنرل اسمبلی کے اجلاس کے موقع پر ایک اہم ملاقات ہوئی ہے۔ ایرانی حکام نے واضح کیا کہ یہ ملاقات مکمل طور پر امریکا کے شدید اصرار پر منقعد کی گئی۔ ایرانی نشریاتی ادارے کے آفیشل ٹیلی گرام چینل پر جاری رپورٹ کے مطابق، تہران نے اس بات چیت میں شرکت صرف اس مقصد کے لیے کی تاکہ اسٹریٹجک اہمیت کی حامل آبنائے ہرمز کو بین الاقوامی بحری ٹریفک کے لیے دوبارہ کھولنے کی اپنی بنیادی اور سخت شرائط سے واشنگٹن کو براہِ راست آگاہ کیا جا سکے۔

رپورٹ کے مطابق ایران نے آبنائے ہرمز کی بحالی کے لیے امریکا کے سامنے 3 اہم شرائط رکھی ہیں، جن میں امریکا کی جانب سے عائد کردہ بحری محاصرے کا فوری اور مکمل خاتمہ، دنیا بھر میں موجود ایران کے تمام منجمد اثاثوں کی فوری منتقلی، اور خطے میں ایرانی پراکسی گروہوں اور تمام عسکری محاذوں پر جاری جنگ کی فوری بندی شامل ہے۔ تہران کا موقف ہے کہ ان شرائط کی مکمل پاسداری کے بغیر آبنائے ہرمز کو تجارت اور توانائی کی نقل و حمل کے لیے بحال کرنا ممکن نہیں ہوگا۔