ریفارم یوکے کے لیڈر نائجل فراج پارلیمنٹ کی نشست سے مستعفی

برطانیہ کی دائیں بازو کی سیاسی جماعت ‘ریفارم یوکے’ کے لیڈر نائجل فراج نے تحائف اور مالی سہولیات ظاہر نہ کرنے کے الزامات اور مبینہ اسکینڈل سامنے آنے کے بعد برطانوی پارلیمنٹ کی نشست سے استعفیٰ دے دیا ہے۔

پارلیمنٹ کی رکنیت سے مستعفی ہونے کے باوجود نائجل فراج نے سیاست سے پیچھے ہٹنے کے بجائے عوامی عدالت میں جانے کا فیصلہ کیا ہے۔ اپنے ایک بیان میں انہوں نے اعلان کیا کہ وہ ‘کلیکٹن آن سی’ (Clacton-on-Sea) کے اسی حلقے سے دوبارہ ضمنی انتخاب لڑیں گے جہاں سے وہ منتخب ہوئے تھے۔ ان کا کہنا تھا کہ اب اس حلقے کے عوام ہی ووٹ کے ذریعے میرے سیاسی مستقبل کا فیصلہ کریں گے۔

نائجل فراج نے اپنے اوپر لگنے والے تمام الزامات کو یکسر مسترد کرتے ہوئے مؤقف اختیار کیا ہے کہ انہوں نے کوئی غلط کام نہیں کیا، نہ ہی کوئی قانون توڑا ہے اور نہ ہی عوامی پیسے کا کوئی غلط استعمال کیا گیا ہے۔ انہوں نے واضح کیا کہ وہ ان الزامات کا سامنا کرنے اور دوبارہ عوامی مینڈٹ حاصل کرنے کے لیے تیار ہیں۔