گیارہواں این ایف سی اجلاس آج، صوبے مالی صورت حال پر بریفنگ دیں گے

اسلام آباد: گیارہویں قومی مالیاتی کمیشن (این ایف سی) کا اہم اجلاس آج وزیر خزانہ سینیٹر محمد اورنگزیب کی صدارت میں ہوگا، جس کا تفصیلی ایجنڈا جاری کر دیا گیا ہے۔ اجلاس میں چاروں صوبوں کے وزرائے خزانہ، پرائیوٹ ممبران اور وفاقی حکام شرکت کریں گے۔

وزارتِ خزانہ کے مطابق اجلاس میں وفاقی سیکریٹری خزانہ مرکزی حکومت کی مالی صورتِ حال پر بریفنگ دیں گے، جبکہ چاروں صوبے بھی اپنی مالی پوزیشن پر 10، 10 منٹ کی بریفنگ پیش کریں گے۔

اعلامیے کے مطابق اجلاس میں نئے این ایف سی ایوارڈ کی تیاری کے لیے آئندہ اجلاسوں کا شیڈول اور ٹائم لائنز بھی طے کی جائیں گی، جبکہ وفاق صوبوں کو اپنی معاشی صورتحال سے آگاہ کرے گا۔

وزیرِ خزانہ محمد اورنگزیب نے کہا ہے کہ اجلاس میں تمام صوبوں کا مؤقف سنا جائے گا اور وفاق اپنی پوزیشن واضح کرے گا۔
انہوں نے زور دیا کہ “ہم پاکستان فرسٹ کے جذبے کے ساتھ بیٹھ رہے ہیں، مقصد بہتر مالیاتی ہم آہنگی اور مضبوط وفاق ہے”۔