نیوزی لینڈ میں کاربن کریڈٹ حاصل کرنے کیلئے پائن کے جنگلات لگانے میں تیزی

نیوزی لینڈ میں کاربن کریڈٹ کے حصول اور منافع بخش تجارتی مقاصد کے لیے بڑے پیمانے پر زرعی اور مویشی بانی کی زمینوں کو پائن (چیل) کے جنگلات میں تبدیل کرنے کا رجحان انتہائی تیز ہو گیا ہے، جس کے باعث ملک کی روایتی لائیو اسٹاک اور مویشیوں کی فارمنگ کو شدید چیلنجز کا سامنا ہے۔ غیر ملکی خبر رساں ایجنسی کی رپورٹ کے مطابق سنہ 2017 سے اب تک تقریباً 3,300 مربع کلومیٹر مویشیوں کی زرعی زمینوں کو جنگلات کی کاشت میں تبدیل کیا جا چکا ہے۔ کاربن کریڈٹس سے حاصل ہونے والی بڑی آمدنی کی بدولت جنگلاتی سرمایہ کار مقامی کسانوں کی بنسبت زرعی زمین خریدنے کے لیے زیادہ قیمتیں پیش کر رہے ہیں، جس سے کسان زمینوں کی ملکیت سے محروم ہو رہے ہیں۔

مقامی کسانوں اور دیہی آبادی نے اس تبدیلی پر گہری تشویش کا اظہار کرتے ہوئے کہا ہے کہ زرعی زمینوں کے جنگلات میں بدلنے سے دیہی علاقوں میں ملازمت کے مواقع، نوجوان خاندانوں کی آبادی اور کمیونٹی کی معاشی و سماجی سرگرمیاں تیزی سے کم ہو رہی ہیں۔ دوسری جانب نیوزی لینڈ کی حکومت کا موقف ہے کہ جنگلات کا فروغ موسمیاتی تبدیلیوں کے اثرات سے نمٹنے اور کاربن کے اخراج کو کم کرنے کے قومی منصوبے کا ایک اہم حصہ ہے۔ تاہم، ماحولیاتی ناقدین کا کہنا ہے کہ کاربن کریڈٹس کے نظام پر حد سے زیادہ انحصار صنعتوں کو اپنی بنیادی آلودگی اور کاربن اخراج میں سائنسی بنیادوں پر کمی لانے کے بجائے محض کریڈٹس خرید کر بری الذمہ ہونے کا موقع فراہم کر رہا ہے۔