نئی دہلی: بھارتی عدالت نےحریت رہنما آسیہ اندرابی کو مجرم قرار دیدیا

نئی دہلی: نئی دہلی میں بھارتی نیشنل انویسٹی گیشن ایجنسی (این آئی اے) کی خصوصی عدالت نے کشمیری حریت رہنما اور دخترانِ ملت کی سربراہ آسیہ اندرابی کو ایک سیاسی مقدمے میں مجرم قرار دے دیا ہے۔

کشمیر میڈیا سروس کے مطابق عدالت نے آسیہ اندرابی کے ساتھ حریت رہنماؤں فہمیدہ صوفی اور ناہیدہ نسرین کو بھی مجرم ٹھہرایا ہے۔ ان کے خلاف مقدمات این آئی اے عدالت میں چلائے گئے، جنہیں کشمیری حلقوں کی جانب سے جھوٹا اور سیاسی بنیادوں پر قائم شدہ قرار دیا جا رہا ہے۔

عدالت کی جانب سے تینوں کشمیری خواتین رہنماؤں کو سزائیں 17 جنوری کو سنائے جانے کا امکان ہے۔

رپورٹ کے مطابق آسیہ اندرابی کو اپریل 2018 میں اس وقت گرفتار کیا گیا تھا جب مقبوضہ کشمیر میں سیاسی قیادت اور حریت کارکنوں کے خلاف کریک ڈاؤن کیا گیا۔ ناقدین کا کہنا ہے کہ اس طرح کی عدالتی کارروائیاں کشمیری عوام کی سیاسی آواز کو دبانے کی کوشش ہیں۔

کشمیر میڈیا سروس نے مزید بتایا کہ آسیہ اندرابی کے شوہر عاشق حسین گزشتہ تین دہائیوں سے جھوٹے مقدمات میں بھارتی قید کاٹ رہے ہیں۔