لبنان سے انخلا کا ارادہ نہیں، ایران کو جوہری ہتھیار نہیں بنانے دینگے: نیتن یاہو

اسرائیلی وزیراعظم بنیامین نیتن یاہو نے اعلان کیا ہے کہ اسرائیل جنوبی لبنان میں اپنے قائم کردہ سیکیورٹی زون پر بدستور قابض رہے گا اور جب تک ضرورت ہوئی، وہاں اسرائیلی فوج کی موجودگی برقرار رکھی جائے گی۔اپنے ایک سخت گیر بیان میں نیتن یاہو نے واضح کیا کہ اسرائیل کا جنوبی لبنان کے سیکیورٹی زون سے پیچھے ہٹنے یا نکلنے کا فی الحال کوئی ارادہ نہیں ہے، اور وہاں فوج کی تعیناتی کو اسرائیل کی سیکیورٹی ضروریات کے مطابق برقرار رکھا جائے گا۔

خطے کی صورتحال اور ایران کے حوالے سے بات کرتے ہوئے اسرائیلی وزیراعظم نے کہا کہ عالمی طاقتوں کے ساتھ کوئی معاہدہ ہو یا نہ ہو، جب تک وہ ملک کے وزیراعظم ہیں، ایران کسی صورت جوہری ہتھیار حاصل نہیں کر سکے گا۔بنیامین نیتن یاہو نے مزید کہا کہ اسرائیل اپنے دفاع اور بقا کے لیے کسی بھی حد تک جا سکتا ہے اور وہ ایران کو ایٹم بم تیار کرنے کی اجازت ہرگز نہیں دے گا۔ انہوں نے عزم ظاہر کیا کہ اس مقصد کے حصول اور ایرانی جوہری پروگرام کو روکنے کے لیے ہر ممکنہ اور ضروری اقدام اٹھایا جائے گا۔