19 تا 23 جولائی شدید بارشوں کا الرٹ جاری، سیلاب کا خدشہ

نیشنل ڈیزاسٹر مینجمنٹ اتھارٹی (این ڈی ایم اے) نے 19 سے 23 جولائی کے دوران ملک کے مختلف حصوں میں شدید مون سون بارشوں، فلیش سیلاب، دریاؤں میں طغیانی اور اربن فلڈنگ کا ہائی الرٹ جاری کر دیا ہے۔ این ڈی ایم اے کے مطابق، مون سون اور مغربی ہواؤں کا ایک طاقتور سلسلہ 20 سے 23 جولائی تک گلگت بلتستان، خیبر پختونخوا، آزاد کشمیر اور بالائی پنجاب میں موسلا دھار بارشوں کا باعث بنے گا، جس سے فلیش سیلاب اور پہاڑی نالوں میں طغیانی کا شدید خطرہ ہے۔ الرٹ میں خبردار کیا گیا ہے کہ دریائے چناب کے مقام مارالہ اور دریائے جہلم کے منگلا کے بالائی حصے سمیت دریائے کابل، پنجکوڑہ، سوات اور چترال میں پانی کی سطح بلند ہو سکتی ہے۔ مزید برآں، راولپنڈی، اسلام آباد، پشاور، لاہور اور گوجرانوالہ سمیت پنجاب و خیبر پختونخوا کے متعدد شہروں کے نشیبی علاقوں میں اربن فلڈنگ کا خدشہ ظاہر کیا گیا ہے۔ این ڈی ایم اے نے متعلقہ اداروں کو ہنگامی مشینری اور ریسکیو ٹیموں کو الرٹ رکھنے کی ہدایت کرتے ہوئے شہریوں کو غیر ضروری سفر اور برساتی نالوں سے دور رہنے کی تاکید کی ہے۔