نارنگ منڈی میں دو مسافر بسوں میں خوفناک تصادم، 5 افراد جاں بحق، 25 زخمی

کالاخطائی روڈ پر دو مسافر بسوں کے درمیان ہونے والے ایک خوفناک تصادم کے نتیجے میں کم از کم 5 مسافر جاں بحق اور 25 افراد شدید زخمی ہو گئے۔ ریسکیو حکام کے مطابق یہ المناک حادثہ سدھانوالی اسٹاپ کے قریب اس وقت پیش آیا جب لاہور سے شکرگڑھ جانے والی ایک تیز رفتار مسافر بس موٹر سائیکل سوار کو بچانے کی کوشش میں بے قابو ہو کر سامنے سے آنے والی دوسری بس سے جا ٹکرائی۔ تصادم اس قدر شدید تھا کہ دونوں بسیں قابو سے باہر ہو کر سڑک کنارے کھیتوں میں جا گریں، جس کے باعث بسوں میں سوار مسافروں میں چیخ و پکار مچ گئی۔ اطلاع ملتے ہی ریسکیو ٹیموں نے فوری طور پر جائے وقوعہ پر پہنچ کر امدادی کارروائیاں شروع کیں، زخمیوں کو ملبے سے نکال کر ابتدائی طبی امداد دی گئی اور فوری طور پر قریبی اسپتال منتقل کیا گیا۔ ریسکیو حکام کا کہنا ہے کہ 3 زخمیوں کی حالت انتہائی تشویشناک ہونے کے باعث انہیں طبی امداد کے لیے لاہور کے اسپتال ریفر کر دیا گیا ہے۔