میانمار میں آن لائن فراڈ سینٹرز پر فوج کا بڑا کریک ڈاؤن، 38 پاکستانی بازیاب

میانمار میں آن لائن فراڈ سینٹرز کے خلاف بڑے آپریشن میں مقامی فوج نے کارروائی کرتے ہوئے 38 پاکستانیوں سمیت سینکڑوں غیر ملکیوں کو رہا کردیا۔ فراڈ سینٹرز سے نکلنے والے ان پاکستانیوں کو تھائی آرمی نے سرحد عبور کر کے ریسکیو کیا اور انہیں بنکاک امیگریشن سینٹر منتقل کر دیا، جہاں سے انہیں مرحلہ وار ڈی پورٹ کیا جائے گا۔

تھائی حکومت نے پاکستان کو تحریری طور پر آگاہ کیا ہے کہ میانمار کے شیلٹر ہاؤسز میں مزید 60 پاکستانی موجود ہیں جو مختلف فراڈ نیٹ ورکس سے بچ نکلے تھے۔ تھائی حکام نے مطالبہ کیا کہ ڈی پورٹ کیے جانے والے افراد سے تفتیش کر کے ایجنٹوں کے خلاف کارروائی کی جائے، جب کہ ڈی پورٹ ہونے والوں کے نام پانچ سال کے لیے ای سی ایل میں ڈالنے کی بھی ہدایت کی گئی ہے۔

ایف آئی اے حکام کے مطابق تھائی لینڈ، میانمار اور کمبوڈیا خطے کے اہم آن لائن فراڈ مراکز ہیں، جہاں جعلی کال سینٹرز چلانے والے گروہ نوجوانوں کو آن لائن نوکریوں اور ورک ویزوں کا جھانسہ دے کر بیرونِ ملک بلواتے ہیں۔ حکام کا کہنا ہے کہ ان افراد کو وہاں پہنچتے ہی قید کر لیا جاتا ہے، اس لیے پاکستانی نوجوان ان دھوکہ دہی پر مبنی آفرز سے سختی سے گریز کریں۔