سندھ کو 18 برسوں میں 22 ہزار ارب روپے ملے، کراچی کو صرف 3 فیصد دیا گیا: مصطفیٰ کمال

ایم کیو ایم پاکستان کے سینئر رہنما مصطفیٰ کمال نے کہا ہے کہ سندھ کی 95 فیصد آمدنی پیدا کرنے والے شہر کراچی کو گزشتہ 18 برسوں میں صوبے کو ملنے والے 22 ہزار ارب روپے میں سے صرف 3 فیصد حصہ ملا ہے۔ کراچی میں ایک کانفرنس سے خطاب کرتے ہوئے انہوں نے کہا کہ وفاق نے رواں بجٹ میں سندھ کو 2,263 ارب روپے دیے، مگر کراچی کو بنیادی سہولیات، صاف پانی اور تعلیمی وسائل سے محروم رکھا گیا۔ مصطفیٰ کمال نے دعویٰ کیا کہ منتقل ہونے والی خطیر رقم کی وجہ سے دبئی میں پراپرٹی مہنگی ہوئی ہے اور اب نئے صوبوں و مقامی حکومتوں کے قیام کے بغیر ملک چلانا ناممکن ہو چکا ہے۔ انہوں نے واضح کیا کہ ایم کیو ایم نے نئے صوبوں کے لیے آئینی بل پیش کر دیا ہے اور حقوق کے حصول کے لیے شاہ فیصل ٹاؤن میں جلسے کے بعد سڑکوں پر آنے کا راستہ اختیار کیا جائے گا۔