شدید دھند نے مری کو لپیٹ میں لے لیا، حدِ نگاہ متاثر ہونے سے انتباہ جاری

ملکہ کوہسار مری اور اس کے گردونواح میں شدید دھند کے باعث مختلف شاہراہوں پر حدِ نگاہ انتہائی کم ہو گئی ہے، جس کی وجہ سے ٹریفک کی روانی بری طرح متاثر اور گاڑیوں کی رفتار سست پڑ گئی ہے۔ ڈی پی او مری ڈاکٹر محمد رضا تنویر کے مطابق، خراب موسمی صورتحال اور دھند کے پیشِ نظر مری پولیس اور ٹریفک وارڈنز کو فوری طور پر ہائی الرٹ کر دیا گیا ہے، جبکہ مری آنے والے شہریوں اور سیاحوں کی رہنمائی و مدد کے لیے اضافی نفری مختلف اہم شاہراہوں پر تعینات کر دی گئی ہے۔

ڈی پی او مری نے شہریوں اور سیاحوں کو سختی سے ہدایت کی ہے کہ وہ موجودہ ناموافق موسمی حالات میں کسی بھی قسم کے غیر ضروری سفر سے مکمل گریز کریں۔ انہوں نے مری میں موجود مقامی افراد اور باہر سے آنے والے سیاحوں پر زور دیا کہ وہ دورانِ ڈرائیونگ گاڑیاں انتہائی احتیاط سے چلائیں، گاڑیوں کی رفتار کم رکھیں، فوگ لائٹس کا استعمال کریں اور ٹریفک قوانین کی پابندی کو یقینی بنائیں۔ موسمی چیلنج سے نمٹنے کے لیے ڈی پی او نے خود بھی مختلف شاہراہوں کا دورہ کر کے ٹریفک پلان کی نگرانی شروع کر دی ہے تاکہ سڑکوں پر ٹریفک کا بہاؤ برقرار رکھا جا سکے اور کسی بھی ممکنہ ہنگامی صورتحال یا حادثے کی صورت میں بروقت امدادی کارروائی عمل میں لائی جا سکے۔