ایرانی قوم امریکااوراسرائیل کے خلاف مزید مضبوط ہوچکی ہے، مجتبیٰ خامنہ ای

ایرانی سپریم لیڈر آیت اللہ مجتبیٰ خامنہ ای نے کہا ہے کہ حالیہ جنگ میں ایرانی قوم کی مزاحمت نے ثابت کر دیا کہ  ہم امریکا اور اسرائیل کے خلاف مزید مضبوط اور متحد ہوچکے ہیں۔

ایران میں یومِ تحفظِ زبانِ فارسی کے موقع پربیان میں مجتبیٰ خامنہ ای نے کہاکہ ایرانی عوام نے امریکا اور اسرائیل کے خلاف جنگ  میں مقدس دفاع کے دوران یہ ثابت کیا کہ فردوسی کی شاہکار رزمیہ نظم ’’شاہ نامہ‘‘ صرف داستان نہیں بلکہ ایرانی قوم کی حقیقی زندگی اور بہادری کی عکاسی ہے۔

ایران کے سپریم لیڈر نے مزید کہا کہ نظم ’’شاہ نامہ‘‘ میں بیان کیے گئے قرآنی اور بہادرانہ تصورات ایرانی معاشرے کے تمام نسلی اور سماجی طبقات کو اتحاد، آزادی اور قومی شناخت کے تحفظ کے لیے ایک پلیٹ فارم پر جمع کرتے ہیں۔

انہوں نے اپنے بیان میں ایرانی اساطیر کے ظالم کردار “ضحاک” کا حوالہ دیتے ہوئے امریکا اور اسرائیل کوضحاک جیسے جارح قرار دیا۔

ضحاک ایران کی تاریخ کا ظالم و جابر ترین بادشاہ تھا۔ جس کے بارے میں کہا جاتا ہے کہ اس کے دونوں شانوں پر دو سانپ پیدا ہو گئے تھے۔

ان سانپوں کی غذا انسان کا گوشت تھی چنانچہ ضحاک ہر روز کسی نوجوان کو مار کر اس کا گوشت سانپوں کو پیش کیا کرتا تھا۔