ایم کیو ایم کا آج حیدر آباد میں سندھ حکومت کیخلاف ریلی نکالنے کا اعلان

ایم کیو ایم پاکستان نے سندھ حکومت کی ناہلی اور شہر کے بڑھتے مسائل کے خلاف آج حیدرآباد میں احتجاجی ریلی نکالنے کا اعلان کیا ہے۔ ایم کیو ایم کے رہنما علی خورشیدی نے اپنے بیان میں کہا کہ حیدرآباد میں نا اہل سندھ حکومت کے خلاف ہزاروں لوگ سڑکوں پر نکلیں گے، کیونکہ پیپلزپارٹی نااہلی کے عروج پر پہنچ چکی ہے اور اس ظالمانہ نظام کے خلاف جدوجہد ضروری ہو گئی ہے۔ انہوں نے مزید کہا کہ سندھ کے دوسرے بڑے شہر میں شہری تین ماہ سے پینے کے پانی سے محروم ہیں، بجلی، تعلیم، روزگار اور ٹرانسپورٹ کا کوئی نظام موجود نہیں ہے۔ علی خورشیدی کا کہنا تھا کہ حکومت اپنی بنیادی ذمہ داریاں نبھانے میں مکمل طور پر ناکام ہو چکی ہے اور حکمرانوں کو عوامی محرومیوں کا جواب دینا پڑے گا۔