امن و امان کی صورتِ حال: موٹر وے ایم ون اسلام آباد ٹول پلازہ سے چھچھ تک ہر قسم کی ٹریفک کے لیے بند

پی ٹی آئی کے متوقع احتجاج اور امن و امان کی صورتِ حال کے پیشِ نظر موٹر وے ایم ون (M-1) کو اسلام آباد ٹول پلازہ سے چھچھ انٹرچینج تک ہر قسم کی ٹریفک کے لیے مکمل طور پر بند کر دیا گیا ہے۔ موٹر وے پولیس کی جانب سے راستے کی مسدودی کو یقینی بنانے کے لیے اسلام آباد ٹول پلازہ پر ہیوی ٹرالرز اور رکاوٹیں کھڑی کر دی گئی ہیں تاکہ اٹک اور گردونواح کی جانب گاڑیوں کی نقل و حرکت کو روکا جا سکے۔

اس صورتِ حال سے نمٹنے کے لیے نیشنل ہائی ویز اینڈ موٹر وے پولیس (NHMP) کی ٹیمیں موقع پر موجود ہیں، جنہیں امن و امان برقرار رکھنے کے لیے پنجاب پولیس کی انتظامی معاونت بھی حاصل ہے۔ موٹر وے پولیس نے شہریوں کو زحمت سے بچنے کے لیے غیر ضروری سفر سے گریز کرنے اور سفر سے قبل ہیلپ لائن 130 سے متبادل راستوں سے متعلق رہنمائی حاصل کرنے کی ہدایت کی ہے۔