مون سون بارشوں کے باعث پنجاب کے دریاؤں میں پانی کے بہاؤ میں اضافہ

شدید مون سون بارشوں کے باعث پنجاب کے دریاؤں اور ندی نالوں میں پانی کے بہاؤ میں مسلسل اضافہ دیکھا جا رہا ہے۔ پی ڈی ایم اے پنجاب کے مطابق دریائے سندھ میں تربیلا کے مقام پر 3 لاکھ 36 ہزار اور چشمہ کے مقام پر 3 لاکھ 2 ہزار کیوسک کے ساتھ نچلے درجے کی سیلابی صورتحال ہے۔ اسی طرح دریائے چناب میں بھی مرالہ کے مقام پر 1 لاکھ 95 ہزار، خانکی کے مقام پر 2 لاکھ 62 ہزار اور قادر آباد میں 2 لاکھ 45 ہزار کیوسک بہاؤ کے ساتھ نچلی سطح کا سیلاب ہے۔ پی ڈی ایم اے کے مطابق نارووال کے نالہ بسنتر میں درمیانے درجے جبکہ گجرات کے نالہ بھمبر اور وزیر آباد کے نالہ پلکھو میں نچلے درجے کی طغیانی ریکارڈ کی گئی ہے، تاہم دریائے ستلج اور جہلم میں پانی کا بہاؤ فی الحال نارمل ہے۔