مولڈووا کے وزیر اعظم الیگزینڈرو مونٹیانو نے استعفیٰ دے دیا

یورپی ملک مولڈووا کے وزیر اعظم الیگزینڈرو مونٹیانو نے اپنے عہدے سے اچانک استعفیٰ دے کر ملک میں ایک نیا سیاسی بحران پیدا کر دیا ہے۔

میڈیا رپورٹس کے مطابق، الیگزینڈرو مونٹیانو جو نومبر 2025 سے وزارتِ عظمیٰ کے منصب پر فائز تھے، نے اپنے ایک مختصر بیان میں استعفے کا اعلان کیا۔ انہوں نے مؤقف اختیار کیا کہ وہ محسوس کرتے ہیں کہ اب اپنے اصولوں اور ذاتی اقدار کے مطابق مزید حکومتی ذمہ داریاں انجام نہیں دے سکتے، اس لیے وہ اپنے عہدے سے الگ ہو رہے ہیں۔ اگرچہ انہوں نے استعفے کی کوئی مخصوص یا تفصیلی وجہ بیان نہیں کی، تاہم حالیہ دنوں میں سرکاری فضائی نیویگیشن کمپنی ‘مولڈاٹسا’ (MoldATSA) میں مبینہ بے ضابطگیوں اور حکام کی بھاری تنخواہوں کے معاملے پر ان کی حکومت کو شدید عوامی اور سیاسی تنقید کا سامنا تھا، جسے اس استعفے کی بڑی وجہ قرار دیا جا رہا ہے۔

دوسری جانب، مولڈووا کی صدر مایا ساندو نے وزیر اعظم الیگزینڈرو مونٹیانو کی خدمات کو سراہتے ہوئے ان کا استعفیٰ منظور کر لیا ہے۔ صدر نے اعلان کیا ہے کہ نئے وزیر اعظم کی تقرری تک الیگزینڈرو عبوری طور پر اپنے فرائض انجام دیتے رہیں گے، جبکہ نئی حکومت کی تشکیل کے لیے آئندہ ہفتے پارلیمانی جماعتوں سے باقاعدہ مشاورت شروع کی جائے گی۔

سیاسی تجزیہ کاروں کے مطابق، وزیر اعظم کا یہ اچانک استعفیٰ صدر مایا ساندو اور ان کی یورپ نواز حکمران جماعت ‘پاس’ (PAS) کے لیے ایک بڑا سیاسی دھچکا اور چیلنج ہے۔ یہ پیش رفت ایک ایسے نازک وقت پر سامنے آئی ہے جب مولڈووا یورپی یونین (EU) میں شمولیت کی کوششوں میں مصروف ہے اور خطے کی بدلتی ہوئی جغرافیائی و سیاسی صورتحال کے باعث شدید دباؤ کا شکار ہے۔