محسن نقوی تہران پہنچ گئے، ایرانی اعلیٰ قیادت سے ملاقاتیں متوقع

وفاقی وزیرِ داخلہ محسن نقوی اہم دورے پر تہران پہنچ گئے ہیں، جہاں وہ ایرانی اعلیٰ قیادت کے ساتھ اہم ملاقاتیں کریں گے۔ تہران ایئرپورٹ پہنچنے پر ان کا استقبال ایرانی ہم منصب اسکندر مومنی نے کیا۔ اس موقع پر دونوں رہنماؤں نے دوطرفہ تعلقات کی گرمجوشی کا اعادہ کیا۔

ذرائع کے مطابق وفاقی وزیرِ داخلہ محسن نقوی کے اس دورے کا بنیادی مقصد پاک ایران سرحد پر سیکیورٹی کے معاملات کو مزید بہتر بنانا اور خطے کی مجموعی صورتحال پر تبادلہ خیال کرنا ہے۔ ایرانی قیادت کے ساتھ ملاقاتوں میں بارڈر مینجمنٹ، انسدادِ دہشت گردی اور باہمی دلچسپی کے علاقائی امور پر سیر حاصل گفتگو کی جائے گی۔ واضح رہے کہ محسن نقوی اس سے قبل بھی خطے میں سیکیورٹی اور تجارتی تعاون کے فروغ کے سلسلے میں ایران کے متعدد اہم دورے کر چکے ہیں۔