مودی حکومت کی غلط بیانی بے نقاب، اپوزیشن اور سابق فوجی قیادت کا شدید غصہ

مودی حکومت پر اپنی سیاسی ہزیمت اور ناکامی کو چھپانے کے لیے ‘آپریشن سندور’ میں ہلاک ہونے والے اپنے ہی فوجیوں کی قربانیوں کو پسِ پشت ڈالنے اور ان کے ساتھ غداری کرنے کا سنگین الزام عائد کیا گیا ہے۔

مختلف حلقوں کے مطابق، پہلگام فالس فلیگ آپریشن کی آڑ میں شروع کیا گیا ‘آپریشن سندور’ دراصل مودی حکومت کی دم توڑتی سیاست کو بچانے کا ایک ناکام حربہ تھا۔ معروف بھارتی جریدے ‘دی ہندو’ کی رپورٹ کا حوالہ دیتے ہوئے بتایا گیا ہے کہ بھارتی وزیر دفاع راج ناتھ سنگھ نے آپریشن سندور کے اصل سچ کو 13 مہینوں تک دنیا اور عوام سے چھپا کر رکھا، جسے بھارتی فوجیوں کی قربانی کا مذاق اڑانے کے مترادف قرار دیا جا رہا ہے۔

اس معاملے پر بھارتی کڑی تنقید کرتے ہوئے کانگریس کی رہنما سپریا شرینیت نے کہا کہ راجناتھ سنگھ جوانوں کی ہلاکت پر جھوٹ بول کر ان کی قربانیوں کا سرعام مذاق اڑانے والے بزدل ثابت ہوئے ہیں۔ دوسری جانب، ریٹائرڈ ونگ کمانڈر انوما آچاریہ نے مودی حکومت کو سخت الفاظ میں نشانہ بناتے ہوئے اسے سیاسی مفادات کے لیے اپنے ہی فوجیوں کو دھوکہ دینے والی تاریخ کی بدترین حکومت قرار دیا ہے۔

سابق بھارتی فوجی افسر کرنل روہت چوہدری نے بھی اس حوالے سے مودی حکومت کی پالیسیوں کا پردہ چاک کرتے ہوئے کہا کہ مودی کی ہندوتوا پارٹی صرف الیکشن جیتنے کے لیے فوج کے نام کا استعمال کرتی ہے اور اس پر سیاست چمکانے کا دھندا کرتی ہے۔ اس بڑے انکشاف کے بعد بھارتی اپوزیشن نے جھوٹ پر قائم مودی حکومت سے فوری طور پر اقتدار چھوڑنے اور قوم سے معافی مانگنے کا مطالبہ کر دیا ہے۔

بھارت کے معروف صحافی سوجیت نائر نے اس پورے معاملے پر روشنی ڈالتے ہوئے انکشاف کیا ہے کہ مودی حکومت کے لیے فوجی جوانوں کی جانیں صرف اور صرف اقتدار کی کرسی حاصل کرنے کا ایک ذریعہ ہیں۔ انہوں نے واضح کیا کہ آپریشن سندور میں بھارتی فوجی جوانوں کی موت کو اتنے عرصے تک چھپا کر رکھنا کوئی فتح نہیں بلکہ یہ مودی حکومت کی ہار اور بوکھلاہٹ کا سب سے بڑا اعتراف ہے۔