2 لاکھ ٹن چینی برآمد کرنے کی اجازت دے دی گئی

وفاقی وزارتِ قومی غذائی تحفظ و تحقیق نے ملک سے 2 لاکھ ٹن چینی برآمد کرنے کی باضابطہ منظوری دے دی ہے۔ یہ فیصلہ وفاقی وزیر برائے قومی غذائی تحفظ و تحقیق رانا تنویر حسین کی زیرِ صدارت منعقدہ ‘شوگر ایڈوائزری بورڈ’ کے اعلیٰ سطح اجلاس کے دوران کیا گیا۔ اجلاس میں تمام صوبائی نمائندوں، کسانوں کی تنظیموں اور پاکستان شوگر ملز ایسوسی ایشن کے عہدیداروں نے شرکت کی اور ملک میں چینی کے موجودہ ذخائر اور استعمال کا تفصیلی جائزہ لیا گیا۔

اجلاس کے دوران چینی کی برآمد سے متعلق حتمی منظوری دستیاب اعداد و شمار، ملکی ضرورت اور زائد ذخائر کو مدنظر رکھتے ہوئے دی گئی۔ وفاقی وزیر رانا تنویر حسین نے واضح کیا کہ چینی کی بیرونِ ملک برآمد کی اجازت کا مقصد شوگر انڈسٹری اور کسانوں کے مفادات کے درمیان توازن برقرار رکھنا ہے تاکہ صنعتی عمل اور زرعی معیشت دونوں کو فروغ مل سکے۔

وفاقی وزیر نے شوگر مل مالکان کو سخت ہدایت جاری کرتے ہوئے کہا کہ وہ گنا کاشتکاروں کو ان کی فصل کی بروقت ادائیگیاں ہر صورت یقینی بنائیں۔ انہوں نے زور دیا کہ کسانوں کے معاشی حقوق اور مفادات کا تحفظ موجودہ حکومت کی اولین ترجیح ہے اور ادائیگیاں روکنے یا تاخیری حربے استعمال کرنے والی ملز کے خلاف کارروائی کی جائے گی۔