میکسیکو: فوجی کارروائی میں بدنام زمانہ کارٹیل سربراہ ہلاک، ملک بھر میں ہنگامے

میکسیکو کے مغربی ریاست جالسکو میں سکیورٹی فورسز کے ساتھ فائرنگ کے تبادلے میں بدنام زمانہ کارٹیل سربراہ نیمیسیو اوسیگوئرا المعروف ایل مینچو شدید زخمی ہوا، جسے میکسیکو سٹی منتقل کرتے ہوئے ہلاک کر دیا گیا۔

عالمی خبر رساں اداروں کے مطابق ایل مینچو، طاقتور جالسکو نیو جنریشن کارٹل (CJNG) کا سربراہ تھا، جس نے مختصر عرصے میں عالمی سطح پر منشیات اسمگلنگ کے بڑے نیٹ ورک کی قیادت سنبھالی تھی اور حریف سینالوا کارٹل سے مقابلہ کر رہا تھا، جس کی قیادت پہلے گرفتار ڈرگ لارڈ جواکین ایل چیپو گزمان کر چکے ہیں۔

کارروائی کے بعد ملک بھر میں پرتشدد ہنگامے پھوٹ پڑے، متعدد ریاستوں میں گاڑیاں نذرِ آتش کی گئیں اور مسلح افراد نے شاہراہیں بند کر دیں۔
جالسکو کے گورنر پابلو لیموس ناورو نے شہریوں کو گھروں تک محدود رہنے کی ہدایت کی، جبکہ امریکی حکام نے بھی احتیاطی الرٹ جاری کیا۔

یہ کارروائی میکسیکو کی صدر کلاؤڈیا شین باؤم کی حکومت پر امریکی دباؤ کے تناظر میں کی گئی، جہاں صدر ڈونلڈ ٹرمپ نے منشیات کے خلاف سخت اقدامات کا مطالبہ کیا تھا۔
امریکی نائب وزیر خارجہ کرسٹوفر لینڈاؤ نے ایل مینچو کی ہلاکت کو خطے کے لیے بڑی پیش رفت قرار دیا۔ تشدد کے خدشات کے باعث ایئر کینیڈا نے ساحلی شہر پوئرٹو ولارٹا کے لیے پروازیں عارضی طور پر معطل کر دی ہیں۔