پاکستان اور قطر کے تعلقات مزید مستحکم بنانے کا عزم چیئرمین سینیٹ کی قطری سفیر سے ملاقات

چیئرمین سینیٹ سید یوسف رضا گیلانی نے قطر کے قومی دن کے موقع پر قطر کے سفیر علی بن مبارک الخاطر سے ملاقات کی، جس میں پاک-قطر تعلقات مزید مضبوط بنانے کے عزم کا اظہار کیا گیا۔ گیلانی نے کہا کہ دونوں ممالک کے تعلقات پارلیمانی تعاون، اقتصادی روابط اور خطے میں امن کے مشترکہ اہداف پر قائم ہیں۔ انہوں نے قطر کی ترقی و استحکام کو سراہا اور امیرِ قطر سمیت عوام کو قومی دن کی مبارکباد پیش کی۔ چیئرمین سینیٹ نے نومبر 2025 کی بین الپارلیمانی اسپیکر کانفرنس میں قطر کی فعال شرکت کی تعریف کی اور پاکستانی برآمدات و توانائی کے شعبے میں قطر کے ساتھ شراکت کو تعلقات کا اہم ستون قرار دیا۔ قطر میں مقیم 3 لاکھ سے زائد پاکستانیوں کے کردار کو بھی خراجِ تحسین پیش کیا گیا جبکہ سفیر قطر کی خدمات کو سراہا گیا۔