سعودی ولی عہد کا ایران پر ممکنہ بڑے حملوں کے امریکی منصوبے پر اظہار تشویش

سعودی ولی عہد اور وزیر اعظم شہزادہ محمد بن سلمان نے امریکی صدر ڈونلڈ ٹرمپ کے ساتھ ایک اہم ٹیلیفونک گفتگو کے دوران ایران کے خلاف ممکنہ بڑے پیمانے کے فوجی اقدامات اور خطے میں برپا کشیدگی پر شدید تشویش کا اظہار کیا ہے۔ امریکی نیوز ویب سائٹ ‘ایگزیوس’ کی رپورٹ کے مطابق، وائٹ ہاؤس ایران کی توانائی کی تنصیبات پر حملوں کا جائزہ لے رہا ہے، تاہم سعودی عرب نے جنگ کے پھیلاؤ کو روکنے کے لیے فوری سفارتی راستہ اختیار کرنے کی ضرورت پر زور دیا ہے۔

رپورٹ میں امریکی حکام کے حوالے سے بتایا گیا کہ شہزادہ محمد بن سلمان نے صدر ٹرمپ سے ممکنہ امریکی اقدامات کی وضاحت طلب کی اور زور دیا کہ عسکری شدت پسندی کے بجائے معاملے کو سیاسی و سفارتی ذرائع سے حل کیا جائے۔ اگرچہ اس گفتگو کے حوالے سے وائٹ ہاؤس یا واشنگٹن میں واقع سعودی سفارت خانے نے باضابطہ تبصرہ کرنے سے گریز کیا ہے، تاہم مشرق وسطیٰ کے دیگر ممالک جیسے پاکستان، قطر، متحدہ عرب امارات اور ترکیہ بھی صورتحال کو معمول پر لانے کے لیے سرگرم ہیں۔