عوام اب بیانیے کے نام پر بیوقوف نہیں بنتے ، مریم نواز

وزیراعلی پنجاب مریم نواز نے کہا کہ پی ٹی آئی کے دور میں بھی ضمنی انتخابات میں مسلم لیگ ن کامیاب رہی تھی، تاہم ڈسکہ میں دھاندلی کے بعد سیٹ واپس حاصل کی گئی۔ انہوں نے کہا کہ پارٹی نے قربانیاں دی ہیں اور مشکلات بھی جھیلی ہیں، لیکن عوام کی حمایت سے کبھی بھی الیکشن کا بائیکاٹ نہیں کیا۔

انہوں نے مزید کہا کہ مخالفین نے ہر جگہ الیکشن مہم چلائی اور بائیکاٹ کرنے کا دکھاوا کیا، لیکن اب عوام سمجھ چکی ہے اور ان کے جلسوں میں کوئی شریک نہیں ہوتا۔ عوام اب بیانیے کے نام پر بیوقوف نہیں بنتے۔

مریم نواز نے کہا کہ نواز شریف واحد سیاستدان ہیں جو تین بار وزیراعظم بنے اور ہر بار سازش کے ذریعے انہیں نکالا گیا۔ ہر دور میں کہا گیا کہ نواز شریف کی سیاست ختم ہو گئی، لیکن وہ آج بھی سیاست میں موجود ہیں اور ایک کے بعد دوسری سازش برداشت کر چکے ہیں۔

انہوں نے کہا کہ ملک کا ماضی، حال اور مستقبل نواز شریف ہیں اور مخالفین تاریخ کی کس بند کتاب میں پڑے ہیں، یہ ہم جانتے بھی نہیں۔ بیانیے کی سیاست اس بار بری طرح ناکام ہوئی ہے اور 4 سال کا پی ٹی آئی دور تاریخ کا بدترین دور تھا۔

مریم نواز نے کہا کہ میانوالی میں گرین بس کے افتتاح کے دن یہ یقین ہو گیا کہ تبدیلی آگئی ہے اور نواز شریف کی 40 سالہ سیاست کو مٹانا آسان نہیں۔ انہوں نے الزام لگایا کہ پی ٹی آئی نے 4 سال میں جھوٹ بول کر عوام کو بیوقوف بنایا اور ہر حلقے میں اپنے لیڈرز کی تصاویر کے ساتھ مہم چلائی۔ مریم نواز نے بتایا کہ صدر مسلم لیگ ن نواز شریف نومنتخب ارکان اسمبلی سے ملنے کے لیے بہت خوش تھے۔ انہوں نے ضمنی انتخابات میں فتح پر اللہ تعالیٰ کا شکر ادا کیا اور تمام نومنتخب ارکان اسمبلی کو مبارکباد دی۔ مریم نواز نے کہا کہ تمام ارکان نے اپنے حلقوں میں انتھک محنت کی اور ہری پور میں بھی مسلم لیگ ن کو شاندار کامیابی ملی۔