بلاول کے پنجاب کے شہروں کی صورتحال پر سوالات، مریم اورنگزیب نے ویڈیو جاری کرکے جواب دیدیا

پاکستان پیپلز پارٹی (پی پی پی) کے چیئرمین بلاول بھٹو زرداری کی جانب سے پنجاب کے مختلف شہروں کی صورتحال پر اٹھائے گئے سوالات کے بعد صوبائی سینئر وزیر مریم اورنگزیب نے ویڈیو ثبوت کے ساتھ ان کا جواب دے دیا ہے۔

تفصیلات کے مطابق آزاد کشمیر میں ایک انتخابی جلسے کے دوران بلاول بھٹو زرداری نے لاہور کے علاوہ پنجاب کے دیگر شہروں کی ابتر صورتحال اور ترقیاتی کاموں سے متعلق سوالات اٹھائے تھے۔ اس کے جواب میں سینئر وزیر مریم اورنگزیب نے سوشل میڈیا پر انہی شہروں کی ویڈیوز شیئر کیں جن پر چیئرمین پیپلز پارٹی نے تنقید کی تھی۔

مریم اورنگزیب کی جانب سے جاری کردہ ویڈیوز میں بالخصوص وہاڑی اور قصور سمیت دیگر اضلاع کی جدید سڑکوں، گلیوں اور صفائی ستھرائی کے بہترین انتظامات کو دکھایا گیا ہے۔ مسلم لیگ (ن) کی رہنما نے ویڈیو ثبوت پیش کرتے ہوئے موقف اپنایا کہ پنجاب کے تمام شہروں میں یکساں ترقی اور صفائی کے اعلیٰ معیار پر کام جاری ہے اور حقائق بلاول بھٹو کے دعوؤں کے برعکس ہیں۔