یورپ کے سرپرست نہیں، شراکت دار بننا چاہتے ہیں: امریکی وزیر خارجہ

واشنگٹن/براتسلاوا: امریکی وزیر خارجہ مارکو روبیو نے کہا ہے کہ امریکا یورپ کا سرپرست نہیں بلکہ ایک مضبوط شراکت دار بننے کا خواہاں ہے۔

سلوواکیہ کے وزیر اعظم کے ساتھ مشترکہ پریس کانفرنس سے خطاب کرتے ہوئے مارکو روبیو نے کہا کہ امریکا چاہتا ہے کہ اس کے اتحادی اپنے دفاع کے قابل ہوں۔ ان کا کہنا تھا کہ ہم یورپ اور اپنے اتحادیوں کے ساتھ مل کر کام کرنا چاہتے ہیں تاکہ باہمی تعاون کو مزید مؤثر بنایا جا سکے۔

انہوں نے کہا کہ صدر ڈونلڈ ٹرمپ کی قیادت میں امریکی حکومت نہ صرف سلوواکیہ بلکہ وسطی یورپ کو بھی اس حکمت عملی کا اہم حصہ بنائے گی جس کے تحت امریکا یورپ اور دنیا کے ساتھ اپنے تعلقات کو ازسرنو ترتیب دے رہا ہے۔

مارکو روبیو کا کہنا تھا کہ امریکا رسمی ملاقاتوں تک محدود نہیں رہے گا بلکہ ایسے ٹھوس اقدامات کیے جائیں گے جو دونوں ممالک کے عوام کے لیے فائدہ مند ثابت ہوں۔

ایران سے متعلق گفتگو کرتے ہوئے امریکی وزیر خارجہ نے کہا کہ ماضی میں ایران کے ساتھ کوئی مکمل طور پر کامیاب معاہدہ نہیں ہو سکا۔ ان کا کہنا تھا کہ امریکا ایک کامیاب ڈیل کی کوشش کر رہا ہے، تاہم اگر مذاکرات کامیاب نہ ہوئے تو قانون کے مطابق ضروری اقدامات کیے جائیں گے۔