پاکستان کی منیشہ علی کی شاندار فتح، انگولا کی فائٹر کو شکست دے کر گولڈ میڈل جیت لیا

گلگت بلتستان سے تعلق رکھنے والی باصلاحیت پاکستانی مکسڈ مارشل آرٹس (MMA) فائٹر منیشہ علی نے انگولا کے شہر لوانڈا میں منعقد ہونے والے ‘آئی ایم ایم اے ایف’ (IMMAF) ورلڈ کپ میں شاندار کارکردگی کا مظاہرہ کرتے ہوئے گولڈ میڈل اپنے نام کر لیا ہے۔ فائنل معرکے میں منیشہ علی نے شاندار حکمتِ عملی کا مظاہرہ کرتے ہوئے میزبان ملک انگولا کی فائٹر لیونیلا ازابیل بلائیے (Leonila Isabel Bulaie) کو دوسرے ہی راؤنڈ میں ‘اسٹینڈنگ گلوٹین سبمیشن’ (Standing Guillotine Submission) کے ذریعے چت کر کے عالمی فتح اپنے نام کی۔

تاریخی کامیابی حاصل کرنے کے بعد منیشہ علی کی اپنے والدین سے فون پر ہونے والی جذباتی ویڈیو بھی سوشل میڈیا پر تیزی سے وائرل ہو رہی ہے، جسے صارفین کی جانب سے بے حد سراہا جا رہا ہے۔ گلگت بلتستان ٹورازم اور سپورٹس ڈیپارٹمنٹ کی جانب سے جاری بیان میں ان کی اس فتح کو پاکستان کے لیے عظیم اعزاز قرار دیا گیا ہے۔ لوانڈا میں گولڈ میڈل اپنے نام کرنے کے بعد اب منیشہ علی کی نظریں ‘آئی ایم ایم اے ایف’ ورلڈ چیمپئن شپ پر مرکوز ہیں، جو یکم نومبر سے جارجیا میں شروع ہونے جا رہی ہے۔