ملائیشیا: 16 سال سے کم عمر بچوں کے سوشل میڈیا استعمال پر پابندی کا فیصلہ

بچوں کو سوشل میڈیا کے نقصانات سے محفوظ رکھنے کے لیے ملائیشیا نے ایک اہم قدم اٹھایا ہے۔ حکومت نے فیصلہ کیا ہے کہ آئندہ سال سے سولہ برس سے کم عمر بچوں کے لیے سوشل میڈیا کے استعمال پر پابندی عائد کر دی جائے گی۔ ملائیشین کمیونکیشن منسٹر کے مطابق نئے قوانین کا اطلاق اگلے برس سے ہوگا اور تمام سوشل میڈیا پلیٹ فارمز کو ان قوانین کی پابندی کرنا لازمی ہوگا۔ خاص طور پر ایسے پلیٹ فارمز جن کے ایک لاکھ سے زائد صارفین ہوں، ان کے لیے لائسنس حاصل کرنا بھی لازمی قرار دیا گیا ہے۔غیر ملکی میڈیا رپورٹس کے مطابق فرانس، اسپین، اٹلی، یونان اور ڈنمارک میں بھی بچوں کے سوشل میڈیا کے استعمال پر پابندی یا اس پر سخت قواعد و ضوابط پر غور جاری ہے۔ یہ اقدامات بچوں کی آن لائن حفاظت کو یقینی بنانے کی عالمی کوششوں کا حصہ ہیں۔