سپین میں 87 سالہ خاتون کرایہ دار کی بے دخلی، ہزاروں افراد سڑکوں پر آ گئے

اسپین کے دارالحکومت میڈرڈ میں 87 سالہ خاتون کرایہ دار ماریکارمن اباسکل کو کئی دہائیوں پرانے فلیٹ سے زبردستی بے دخل کیے جانے کے خلاف ہزاروں شہری سڑکوں پر نکل آئے اور کرایہ داروں کے حقوق، رہائشی تحفظ اور دھوکہ دہی کے خلاف سخت قوانین کا مطالبہ کر دیا۔ مظاہرین نے مطالبہ کیا کہ متبادل رہائش کی فراہمی کے بغیر کسی بھی شخص کو گھر سے بے دخل کرنے پر فوری پابندی عائد کی جائے۔ اباسکل 1956 سے اس فلیٹ میں مقیم تھیں، جس کے والد نے اسے کرائے پر لیا تھا، لیکن 2018 میں ایک سرمایہ کاری فنڈ نے پوری عمارت خرید کر کرایہ 500 یورو سے بڑھا کر 1,650 یورو کر دیا، جو ان کی پنشن سے کہیں زیادہ تھا۔

بے دخلی کے وقت شدید علالت کے باعث سٹریچر پر ایمبولینس میں منتقل کی جانے والی 87 سالہ خاتون کی ویڈیو اور خبریں میڈیا پر عام ہونے کے بعد وہ اسپین میں شدید تر ہوتے رہائشی بحران اور مہنگائی کی علامت بن چکی ہیں۔ ‘میڈرڈ ٹیننٹس یونین’ کی کال پر منعقدہ اس احتجاج میں طلبہ، اساتذہ اور ہیلتھ ورکرز سمیت تمام طبقہ ہائے فکر کے لوگوں نے شرکت کی اور پوئرتا ڈیل سول چوک میں خیمے لگا کر دھرنا دیا۔ مظاہرین کا کہنا تھا کہ سیاحت، بین الاقوامی سرمایہ کاری فنڈز اور آمدنی کے مقابلے میں مکانات کے نامناسب کرایوں کے باعث رہائش جیسا بنیادی حق شہریوں کی پہنچ سے دور ہو چکا ہے۔