دریائے چناب میں ہیڈ مرالہ پر نچلے درجے کا سیلاب، ضلعی انتظامیہ الرٹ

دریائے چناب پر واقع ہیڈ مرالہ کے مقام پر نچلے درجے کی سیلابی صورتحال ریکارڈ کی گئی ہے، تاہم دیگر تمام مقامات پر پانی کا بہاؤ فی الحال معمول کے مطابق ہے۔ محکمہ آبپاشی کے جاری کردہ اعداد و شمار کے مطابق، ہیڈ مرالہ پر 131,123 کیوسک پانی کی آمد اور 108,850 کیوسک پانی کا اخراج ریکارڈ کیا گیا، جس کے باعث وہاں نچلے درجے کی سیلابی صورتحال برقرار ہے۔ دوسری جانب، ہیڈ خانکی پر 61,409 کیوسک پانی کی آمد اور 53,697 کیوسک اخراج، جبکہ ہیڈ قادرآباد پر 85,910 کیوسک پانی کی آمد اور 66,385 کیوسک اخراج ریکارڈ کیا گیا ہے اور ان دونوں مقامات پر صورتحال مکمل طور پر قابو میں ہے۔

ضلعی انتظامیہ کا کہنا ہے کہ گزشتہ 12 گھنٹوں کے دوران ضلع گجرات میں بارش تو ریکارڈ نہیں کی گئی، لیکن کسی بھی ہنگامی صورتحال سے نمٹنے اور احتیاطی تدابیر کے تحت تمام متعلقہ محکموں کو الرٹ رہنے کی سخت ہدایت کی گئی ہے۔ انتظامیہ کی جانب سے دریاؤں اور برساتی ندی نالوں میں پانی کی صورتحال پر مسلسل اور باریک بینی سے نظر رکھی جا رہی ہے تاکہ شہریوں کے جان و مال کا تحفظ یقینی بنایا جا سکے۔