پانچ سال بعد انصاف کی طرف ایک قدم: لانگ آئی لینڈ تیزاب حملے کا ملزم گرفتار

امریکا میں 2021 کے لانگ آئی لینڈ تیزاب حملے کے کیس میں تقریباً پانچ سال بعد اہم پیش رفت سامنے آئی ہے، پولیس نے مرکزی ملزم کو گرفتار کر لیا ہے۔

غیر ملکی میڈیا رپورٹس کے مطابق مارچ 2021 میں ایلمونٹ کے علاقے میں 21 سالہ نافعہ اکرام پر اُس وقت تیزاب پھینکا گیا تھا جب وہ اپنی ملازمت سے گھر واپس آرہی تھیں ۔ نامعلوم حملہ آور نے گھر کے باہر گھات لگا کر اُن کے چہرے پر تیزاب پھینک دیا، جس سے وہ شدید جھلس گئیں اور انہیں برسوں تک چہرے کی بحالی کی متعدد سرجریز سے گزرنا پڑا۔

قانون نافذ کرنے والے اداروں نے گرفتار ملزم کی شناخت 29 سالہ ٹیرل کیمبل کے طور پر کی ہے، جو بروکلین کا رہائشی اور ایک ابھرتا ہوا ریپر ہے۔ ملزم نے عدالت میں خود پر عائد الزامات سے انکار کیا ہے، تاہم اسے حملے اور دیگر سنگین دفعات کے تحت بغیر ضمانت حراست میں رکھا گیا ہے۔

استغاثہ کے مطابق سی سی ٹی وی فوٹیج کے ذریعے ملزم کی گاڑی کو جائے وقوعہ سے جوڑا گیا، جبکہ ذرائع کا کہنا ہے کہ حملے کے بعد ملزم نے آن لائن سلفیورک ایسڈ صاف کرنے سے متعلق معلومات تلاش کیں اور ایک گانے میں بھی تیزاب حملے کا حوالہ دیا۔

متاثرہ خاتون اور ان کے اہلِ خانہ طویل عرصے سے تفتیش پر تحفظات کا اظہار کرتے رہے ہیں۔ نافعہ اکرام نے گزشتہ برس کہا تھا کہ انہیں محسوس ہوتا ہے کہ تحقیقات وہیں کھڑی ہیں جہاں 17 مارچ 2021 کو تھیں۔

شدید زخموں اور بے شمار سرجریوں کے باوجود نافعہ اکرام نے حوصلہ نہیں ہارا۔ ان کا کہنا ہے کہ برے دنوں میں بھی انسان کو اپنے لیے کھڑا ہونا پڑتا ہے، کیونکہ اصل امتحان وہی وقت ہوتا ہے۔

پولیس حکام کے مطابق تحقیقات جاری ہیں اور مقدمے کو منطقی انجام تک پہنچایا جائے گا۔