لاہور ہائیکورٹ: جسٹس طارق سلیم شیخ کا کرپٹو کرنسی سے متعلق اہم فیصلہ

لاہور ہائیکورٹ کے جسٹس طارق سلیم شیخ نے کرپٹو کرنسی کے پی ٹو پی (P2P) لین دین اور پیکا (PECA) ایکٹ سے متعلق اہم کیس میں 15 صفحات پر مشتمل تفصیلی فیصلہ جاری کرتے ہوئے ملزمان حماد علی، اسد امجد اور محمد اطہر کی قبل از گرفتاری ضمانتیں منظور کر لیں۔ عدالت نے اہم قانونی اصول طے کرتے ہوئے قرار دیا کہ صرف آن لائن پلیٹ فارم کے ذریعے ورچوئل اثاثوں (یو ایس ڈی ٹی) کی خرید و فروخت یا بینک اکاؤنٹ میں رقم منتقل ہونے سے کوئی شخص ازخود دھوکہ دہی، جعلسازی یا الیکٹرانک فراڈ کا مرتکب نہیں ہو جاتا۔ عدالت نے واضح کیا کہ کرپٹو کرنسی اگرچہ پاکستان میں ‘لیگل ٹینڈر’ نہیں، تاہم 2018 میں جاری اسٹیٹ بینک کا سرکلر محض بینکوں اور ریگولیٹڈ اداروں کے لیے ہدایات پر مبنی تھا، اس سے نجی افراد کے خلاف فوجداری جرم قائم نہیں ہوتا۔ عدالت نے ملزمان کو 1، 1 ملین روپے کے ضمانتی مچلکے جمع کرانے کا حکم دیا۔