لبنان میں اسرائیلی فضائی حملوں میں 4 افراد جاں بحق، 20 زخمی

بیروت: جنوبی لبنان کے مختلف علاقوں میں اسرائیلی جنگی طیاروں کی شدید بمباری کے نتیجے میں 2 خواتین سمیت 4 افراد جاں بحق جبکہ متعدد بچوں اور خواتین سمیت 20 سے زائد افراد زخمی ہو گئے ہیں۔

لبنانی وزارتِ صحت کے مطابق اسرائیلی فضائی حملوں میں نباتیہ الفوقہ میں 2 افراد جبکہ عرب سلیم کے علاقے میں 2 خواتین جاں بحق ہوئیں۔ لبنانی سرکاری خبر رساں ایجنسی کے مطابق اسرائیلی فوج نے پہلے عرب سلیم میں ایک عمارت کو حزب اللہ کے زیرِ استعمال ہونے کا بہانہ بنا کر خالی کرنے کی وارننگ دی، تاہم بعد ازاں قریبی رہائشی مکان کو نشانہ بنایا جس کے نتیجے میں دو خواتین جاں بحق ہوئیں، جس کے بعد انتباہ شدہ عمارت کو بھی تباہ کر دیا گیا۔

اسرائیلی فوج نے دعویٰ کیا ہے کہ یہ کارروائی اسرائیلی اہلکاروں پر کیے گئے دو ڈرون حملوں کے جواب میں حزب اللہ کے ٹھکانوں پر کی گئی ہے۔ دوسری جانب لبنانی حکام نے بتایا کہ نباتیہ میں واقع غیر فعال غنڈور ہسپتال کے ایک حصے کے علاوہ شہر کی تاریخی عمارتوں، سرکاری مالیاتی اور زرعی اداروں کے دفاتر کو بھی فضائی حملوں میں شدید نقصان پہنچا ہے۔