امریکہ جنوبی لبنان سے انخلا کیلئے اسرائیل پر دباؤ ڈالے: لبنانی صدر

لبنانی صدر جوزف عون نے امریکی صدر ڈونلڈ ٹرمپ سے ٹیلیفون پر رابطہ کر کے مطالبہ کیا ہے کہ امریکہ، اسرائیل پر جنوبی لبنان سے اپنی فوجیں واپس بلانے کے لیے دباؤ ڈالے۔ انہوں نے امریکی صدر پر زور دیا کہ واشنگٹن دونوں پڑوسی ممالک کے درمیان طے پانے والے حالیہ سیکیورٹی معاہدے کی اسرائیلی خلاف ورزیوں کو روکنے میں اپنا کردار ادا کرے۔

لبنانی ایوانِ صدر (بعبدا پیلس) کی جانب سے جاری کردہ باضابطہ اعلامیے کے مطابق، صدر جوزف عون نے ٹیلیفونک گفتگو کے دوران اپنے امریکی ہم منصب کو یقین دلایا کہ لبنان، اسرائیل کے ساتھ طے پانے والے فریم ورک معاہدے پر عمل درآمد کی تمام تر ذمہ داریاں خود سنبھالنے کی بھرپور صلاحیت رکھتا ہے۔  لبنانی صدر نے امریکہ سے مطالبہ کیا کہ وہ اسرائیل کو جنوبی لبنان سے انخلا اور معاہدے کی پاسداری کرنے پر مجبور کرے۔ لبنان کی جانب سے معاہدے کے فوراً بعد ہونے والی سرحدی کشیدگی اور اسرائیلی کارروائیوں پر گہری تشویش کا اظہار کیا گیا۔ صدر جوزف عون نے واضح کیا کہ بیروت حکومت معاہدے کے تحت اپنی خود مختاری کا تحفظ کرے گی اور فریم ورک پر عمل درآمد کو یقینی بنائے گی۔ یہ رابطہ ایک ایسے وقت میں ہوا ہے جب لبنان کے اندر اس معاہدے کے خلاف شدید عوامی احتجاج دیکھا جا رہا ہے اور دوسری جانب حزب اللہ نے بھی اسے ملکی خودمختاری کے خلاف قرار دیا ہے۔