جرمنی نے دوسری جنگ عظیم جیسے حالات پیدا کردیے ہیں: روس

روسی وزیرِ خارجہ سرگئی لاوروف نے لائپزگ ایئرپورٹ پر ڈرون حملے سے متعلق جرمن الزامات کو یکسر مسترد کرتے ہوئے شدید ردِعمل کا اظہار کیا ہے اور کہا ہے کہ جرمنی ایک بار پھر جنگ کی راہ پر گامزن ہو رہا ہے۔ روسی سرکاری ٹی وی کو دیے گئے ایک انٹرویو میں لاوروف نے کہا کہ جرمن اقدامات کو دیکھ کر لگتا ہے کہ یہ ایک حقیقی جنگ کی شروعات ہے۔ انہوں نے نشاندہی کی کہ جرمنی نے بون سے روسی قونصلیٹ جنرل کو باہر نکال دیا ہے اور اب برلن میں واقع ‘روسی ہاؤس’ ثقافتی مرکز کو بھی بند کیا جا رہا ہے۔ موجودہ تناؤ کا موازنہ دوسری جنگِ عظیم سے قبل کے حالات سے کرتے ہوئے لاوروف نے جرمنی پر ناززم اور ہائبرڈ الزامات عائد کیے اور واضح کیا کہ روسی قیادت اس تمام تر صورتحال سے مناسب نتائج اخذ کرے گی۔

واضح رہے کہ جرمن حکومت نے حال ہی میں ماسکو پر مشرقی جرمنی کے لائپزگ ایئرپورٹ پر بارود سے لدے ڈرون کے ذریعے حملے کی ناکام کوشش کا الزام لگایا تھا، جس کے بعد دونوں ممالک نے ایک دوسرے کے سفارتی و ثقافتی مراکز بند کر دیے جبکہ متعدد یورپی ممالک نے بھی روسی سفیروں کو طلب کر کے اپنا احتجاج ریکارڈ کرایا ہے۔ یہ شدید سفارتی کشیدگی ایسے وقت میں سامنے آئی ہے جب یوکرین جنگ کو ساڑھے چار سال سے زائد کا عرصہ بیت چکا ہے اور جرمنی، یوکرین کا ایک اہم عسکری و معاشی اتحادی بن کر ابھرا ہے