لنڈی کوتل اور جمرود میں سیلابی ریلے میں بہنے والے 6 افراد کی لاشیں برآمد

خیبر پختونخوا کے ضلع خیبر کی تحصیلوں لنڈی کوتل اور جمرود میں طوفانی بارشوں کے باعث آنے والے شدید سیلابی ریلوں میں بہہ جانے والی 3 گاڑیوں سے 6 افراد کی لاشیں برآمد کر لی گئی ہیں۔ ریسکیو 1122 کے ترجمان اور ڈسٹرکٹ ایمرجنسی آفیسر انجینئر شارق ریاض خٹک کے مطابق 50 سے زائد اہلکاروں اور غوطہ خور ٹیموں نے امدادی آپریشن میں حصہ لیا، جس کے دوران لنڈی کوتل سے 2 نوجوانوں اور جمرود کے علاقوں سے ایک بچے اور خاتون سمیت 4 افراد کی لاشیں نکال کر قانونی کارروائی کے لیے منتقل کر دی گئیں۔ اس کے علاوہ پاک افغان شاہراہ پر سیلابی پانی میں پھنسنے والی 100 سے زائد گاڑیوں کو محفوظ مقامات پر منتقل کیا گیا اور علی مسجد کیمپ، لنڈی کوتل، سلطان خیل، جمرود اور تختہ بیگ کے راستوں کو کلیئر کر کے ٹریفک بحال کر دی گئی ہے۔ ریسکیو حکام نے شہریوں کو شدید بارشوں کے دوران ندی نالوں کے قریب نہ جانے اور غیر ضروری سفر سے گریز کرنے کی ہدایت کی ہے۔