لکی مروت میں پولیس اور سی ٹی ڈی کا مشترکہ آپریشن، دہشتگرد کمانڈر ہلاک

لکی مروت میں پولیس اور کاؤنٹر ٹیررازم ڈیپارٹمنٹ (سی ٹی ڈی) نے ایک مشترکہ اور مؤثر جواب کارروائی کرتے ہوئے خطرناک دہشت گرد کمانڈر منظور کو ہلاک کر دیا ہے۔ سی پی او کے مطابق گزشتہ روز عبدالخیل کے علاقے میں شاہ حسن خیل سے میچ کھیل کر رکشے پر واپس جانے والے مقامی کھلاڑیوں پر دہشت گردوں نے بزدلانہ حملہ کیا تھا، جس کے نتیجے میں 3 جوان شہید جبکہ 3 زخمی ہو گئے تھے۔

واقعے کے فوراً بعد پولیس اور سی ٹی ڈی نے علاقے کو گھیرے میں لے کر سیکیورٹی آپریشن شروع کیا اور حملے میں ملوث دہشت گردوں کا تعاقب کرتے ہوئے مطلوب کمانڈر منظور کو مقابلے کے بعد جہنم واصل کر دیا۔ ہلاک دہشت گرد کی لاش پولیس نے تحویل میں لے کر اسپتال منتقل کر دی ہے۔ سی پی او کا مزید کہنا ہے کہ کمانڈر منظور شہریوں پر قاتلانہ حملوں اور سنگین دہشت گردی کے متعدد مقدمات میں مطلوب تھا، جبکہ علاقے میں روپوش دیگر دہشت گردوں کی گرفتاری کے لیے سرچ آپریشن مسلسل جاری ہے۔