لکی مروت: پولیس موبائل کے قریب دھماکا، ایک اہلکار شہید, وزیراعظم کی شدید مذمت

لکی مروت میں تھانہ تجوڑی کی پولیس موبائل کے قریب دھماکے میں ایک اہلکار علاؤالدین شہید جبکہ تین اہلکار زخمی ہوگئے۔ پولیس کے مطابق زخمیوں کو فوری طور پر قریبی اسپتال منتقل کردیا گیا ہے جہاں انہیں طبی امداد فراہم کی جارہی ہے۔

وزیراعظم شہباز شریف نے لکی مروت میں پولیس کو نشانہ بنانے والے حملے کی شدید مذمت کی ہے۔ انہوں نے شہید اہلکار کے درجات کی بلندی اور لواحقین کے لیے صبر و حوصلے کی دعا کی ہے۔ وزیراعظم نے متعلقہ حکام کو زخمی اہلکاروں کو فوری اور بہترین طبی سہولتیں فراہم کرنے کی ہدایت بھی کی۔وزیراعظم شہباز شریف کا کہنا تھا کہ دہشت گردوں کے مزموم عزائم کو ہر صورت ناکام بنایا جائے گا اور دہشت گردی کے مکمل خاتمے کے لیے حکومت پُرعزم ہے۔ انہوں نے کہا کہ قوم اپنے بہادر شہداء کی قربانیوں کو ہمیشہ یاد رکھے گی