لاہور: زہریلا کھانا کھانے سے 12 افراد کی حالت غیر، اسپتال منتقل

لاہور کے علاقے کاہنہ کے قریب زہریلا کھانا کھانے سے ایک ہی گھر کے 12 افراد کی حالت پراسرار طور پر خراب ہو گئی، جنہیں فوری طور پر جنرل ہسپتال منتقل کر دیا گیا ہے۔ تفصیلات کے مطابق مضر صحت کھانا کھانے کے باعث تمام افراد کی طبعیت اچانک بگڑ گئی، جس پر امدادی ٹیموں نے موقع پر پہنچ کر متاثرین کو ہسپتال منتقل کیا۔ متاثرہ افراد کا کہنا ہے کہ کھانا کھاتے ہی ان کی طبعیت خراب ہونا شروع ہوئی اور انہیں شبہ ہے کہ سالن میں چھپکلی گرنے کی وجہ سے کھانا زہریلا ہوا۔ دوسری جانب ہسپتال انتظامیہ کا کہنا ہے کہ تمام افراد کو طبی امداد فراہم کی جا رہی ہے، تاہم زہر خورانی کی اصل وجہ کا حتمی تعین طبی رپورٹس آنے کے بعد ہی سامنے آ سکے گا۔ پولیس اور متعلقہ حکام نے واقعے کی تحقیقات شروع کر دی ہیں۔