عظمیٰ خانم اور نورین نیازی کی نظربندی معطل کرنے کی استدعا مسترد

لاہور ہائیکورٹ نے بانی پی ٹی آئی عمران خان کی ہمشیرہ ڈاکٹر عظمیٰ خانم اور نورین نیازی کی نظربندی کے احکامات کے خلاف دائر درخواستوں پر فوری طور پر نوٹیفکیشن معطل کرنے کی استدعا مسترد کر دی ہے۔ لاہور ہائیکورٹ کے جج جسٹس عبہر گل خان نے کیس کی سماعت کی، جس کے دوران عدالت نے پنجاب حکومت سمیت دیگر متعلقہ فریقین کو باضابطہ نوٹسز جاری کرتے ہوئے رپورٹ اور جواب طلب کر لیا ہے۔

سماعت کے دوران درخواست گزاروں کے وکلاء رانا مدثر عمر اور بیرسٹر تیمور نے مؤقف اختیار کیا کہ دونوں خواتین گھریلو ہیں اور ڈاکٹر عظمیٰ خانم تو متعلقہ مقدمے میں بے قصور بھی قرار پا چکی ہیں، جس کے شواہد ٹرائل کورٹ کے فیصلے کی شکل میں نتھنتھ ہیں۔ وکلاء نے ڈپٹی کمشنر کے جاری کردہ نظربندی کے نوٹیفکیشن کو فوری طور پر کالعدم اور معطل کرنے کی استدعا کی، جبکہ پنجاب حکومت کی جانب سے ایڈووکیٹ فرخ لودھی پیش ہوئے۔ عدالت نے فوری معطلی کی استدعا رد کرتے ہوئے آئندہ سماعت کے لیے فریقین کو تفصیلی جواب جمع کرانے کی ہدایت کی ہے۔