لاہور: گھر کی چھت گرنے سے بچوں سمیت تین افراد جاں بحق، ایک زخمی

لاہور کے علاقے گڑھی شاہو کی ریلوے کالونی میں مٹی اور ٹی آئرن گارڈر سے بنے مکان کی چھت اچانک گرنے سے ملبے تلے دب کر ایک ہی خاندان کے 3 افراد جاں بحق جبکہ 1 لڑکی زخمی ہو گئی۔ ریسکیو 1122 حکام کے مطابق حادثے کی اطلاع ملتے ہی فوری امدادی کارروائی شروع کی گئی اور ملبے تلے دبے تمام 4 افراد کو نکال لیا گیا۔ جاں بحق ہونے والوں میں 45 سالہ مبین، اس کی 40 سالہ اہلیہ اور 11 سالہ بیٹی فاطمہ شامل ہیں، جبکہ 14 سالہ زخمی لڑکی ایمل کو طبی امداد کے لیے فوری طور پر ہسپتال منتقل کر دیا گیا ہے۔ ریسکیو ذرائع کا کہنا ہے کہ موقع پر آپریشن مکمل کر لیا گیا ہے۔