ایران کی جانب سے داغے گئے 21 ڈرونز اور 4 کروز میزائل فضا میں تباہ کردیئے: کویت

کویت کی وزارتِ دفاع نے تصدیق کی ہے کہ ایرانی فورسز کی جانب سے داغے گئے کم از کم 21 بارود بردار ڈرونز اور 4 کروز میزائلوں کو ملکی فضائی دفاعی نظام (ایئر ڈیفنس سسٹم) کی مدد سے کامیابی کے ساتھ فضا میں ہی تباہ کر دیا گیا ہے۔ وزارتِ دفاع کے ترجمان کی جانب سے جاری کردہ ہنگامی بیان کے مطابق، اس ایرانی حملے کا ہدف ملک کی متعدد اہم اور حساس تنصیبات تھیں، جس کے نتیجے میں دفاعی نظام کی مداخلت کے باوجود گرے ہوئے ملبے کی وجہ سے کچھ مقامات پر مادی نقصان ہوا ہے۔

کویت کی وزارتِ دفاع نے مزید واضح کیا کہ خوش قسمتی سے حملے کے نتیجے میں کسی بھی جانی نقصان یا کسی شہری کے زخمی ہونے کی کوئی اطلاع موصول نہیں ہوئی ہے۔ سیکیورٹی فورسز نے متاثرہ علاقوں کو گھیرے میں لے کر تحقیقات کا آغاز کر دیا ہے اور ملک بھر میں سیکیورٹی اور ہنگامی الرٹ کو مزید سخت کر دیا گیا ہے۔