کویت کا اپنی فضائی حدود میں 32 ڈرونز کو نشانہ بنا کر تباہ کرنے کا دعویٰ

کویت کی وزارتِ دفاع نے اعلان کیا ہے کہ ملکی فضائی حدود میں گھسنے والے 32 ڈرونز کی نشاندہی کر کے انہیں بروقت کارروائی کے ذریعے نشانہ بنا کر فضا میں ہی تباہ کر دیا گیا ہے۔ کویتی وزارتِ دفاع کے ترجمان کرنل سعود عبدالعزیز العطوان کے مطابق، ان ایرانی حملوں کا بنیادی ہدف ملک کی متعدد انتہائی اہم تنصیبات تھیں، تاہم کویتی مسلح افواج نے فوری اور موثر جوابی کارروائی کرتے ہوئے تمام ڈرونز کا راستہ روکا اور انہیں مار گرایا۔

ترجمان نے مزید بتایا کہ فضا میں ڈرونز کو تباہ کرنے کے نتیجے میں ان کا ملبہ کویت کے مختلف رہائشی علاقوں میں گرا، جس کی وجہ سے کچھ مقامات پر معمولی مالی نقصان ہوا ہے، تاہم خوش قسمتی سے کوئی جانی نقصان رپورٹ نہیں ہوا۔ وزارتِ دفاع نے اپنے عزم کا اعادہ کرتے ہوئے کہا کہ کویتی مسلح افواج ملکی دفاع، قومی سلامتی کے تحفظ، شہریوں اور مقیم غیر ملکیوں کی حفاظت کے لیے ہر وقت الرٹ اور مستعد ہیں اور اپنی ذمہ داریاں پیشہ ورانہ انداز میں انجام دیتی رہیں گی۔