کویت کا بجٹ خسارہ 23 ارب ڈالر تک پہنچ گیا، تیل کی آمدنی میں 11.2 فیصد کمی

عالمی مارکیٹ میں تیل کی قیمتوں میں اتار چڑھاؤ کے باعث کویت کا بجٹ خسارہ 23 ارب ڈالر تک پہنچ گیا ہے، جبکہ ملک کی تیل سے ہونے والی مجموعی آمدنی میں 11.2 فیصد کی نمایاں کمی ریکارڈ کی گئی ہے۔

کویت کی وزارتِ خزانہ کی جانب سے جاری کردہ تازہ اعداد و شمار کے مطابق، مالی سال 2025-26 میں ملک کا بجٹ خسارہ بڑھ کر 7.1 ارب کویتی دینار ہو گیا ہے، جو امریکی ڈالر میں تقریباً 23 ارب ڈالر بنتے ہیں۔ وزارت کے بیان میں بتایا گیا ہے کہ یہ بجٹ خسارہ گزشتہ مالی سال کے مقابلے میں 13.2 فیصد زیادہ ہے۔

رپورٹ کے مطابق، کویت کی مجموعی ملکی آمدنی بھی ابتدائی سرکاری تخمینوں کے مقابلے میں 10 فیصد کم رہی ہے۔ اس کی بنیادی وجہ تیل کی آمدنی میں ہونے والی کمی ہے، جو 11.2 فیصد گرنے کے بعد 15.3 ارب کویتی دینار (تقریباً 49 ارب ڈالر سے زائد) رہ گئی ہے۔ معاشی ماہرین کا کہنا ہے کہ تیل پر ضرورت سے زیادہ انحصار اور عالمی منڈی کی صورتحال کویت کی معیشت کے لیے بڑے چیلنجز پیدا کر رہی ہے۔