کویت کی الجزیرہ ایئرلائن کی پشاور اور سیالکوٹ کے لیے پروازیں چلانے کا اعلان

کویت کی نجی فضائی کمپنی الجزیرہ ایئرلائن نے پاکستان کے دو اہم شہروں پشاور اور سیالکوٹ کے لیے پروازیں شروع کرنے کا اعلان کردیا ہے۔

ایئرلائن کے اعلامیے کے مطابق دونوں شہروں کے لیے ہفتہ وار دو دو پروازیں چلائی جائیں گی، جو دمام کے راستے آپریٹ ہوں گی۔ ان پروازوں کا باقاعدہ آغاز 15 اپریل سے کیا جائے گا۔

اعلامیے میں بتایا گیا ہے کہ پشاور کے لیے پہلی پرواز 17 اپریل کو روانہ ہوگی، جبکہ سیالکوٹ کے لیے پروازیں بدھ اور جمعہ کے روز چلائی جائیں گی۔ سیالکوٹ سے واپسی کی پروازیں جمعرات اور ہفتہ کو ہوں گی۔

اسی طرح کویت سے پشاور کے لیے پروازیں جمعہ اور اتوار کو روانہ ہوں گی، جبکہ پشاور سے کویت کے لیے ہفتہ اور پیر کے روز پروازیں چلائی جائیں گی۔

ایئرلائن حکام کے مطابق اس اقدام سے کویت، دمام اور پاکستان کے درمیان فضائی سفر کرنے والے مسافروں کو مزید سہولت فراہم ہوگی۔