خیبرپختونخوا کو اپنی گیس کی پیداوار سے50فیصد بھی نہیں دیا جاتا : سہیل آفریدی

وزیراعلیٰ خیبرپختونخوا سہیل آفریدی نے کہا ہے کہ صوبہ اپنی ضرورت سے زائد گیس پیدا کرتا ہے لیکن اس کے باوجود اسے اس کے جائز حصے سے محروم رکھا جا رہا ہے۔

انہوں نے کہا کہ خیبرپختونخوا 500 ایم ایم سی ایف ڈی سے زائد گیس پیدا کرتا ہے جبکہ صوبے کی اپنی کھپت صرف 150 ایم ایم سی ایف ڈی ہے، اس کے باوجود گیس کی منصفانہ فراہمی نہیں کی جا رہی۔

مفتی محمود مرکز میں جمعیت علمائے اسلام کے سربراہ مولانا فضل الرحمان سے ملاقات کے دوران گفتگو کرتے ہوئے انہوں نے کہا کہ وفاق خیبرپختونخوا کے ساتھ سوتیلی ماں جیسا سلوک کر رہا ہے۔

ملاقات میں باہمی دلچسپی کے امور، صوبائی حقوق اور آئندہ مالی سال کے وفاقی بجٹ سمیت مختلف امور پر تفصیلی تبادلہ خیال کیا گیا۔

سہیل آفریدی نے کہا کہ ضم شدہ اضلاع کو قومی مالیاتی ایوارڈ میں ان کا حصہ نہیں مل رہا جبکہ پنجاب حکومت کی جانب سے خیبرپختونخوا کو گندم کی فراہمی میں بھی رکاوٹیں پیدا کی جا رہی ہیں۔

انہوں نے مؤقف اختیار کیا کہ وفاقی حکومت اور متعلقہ اداروں کا طرز عمل آئین کی شقوں کی خلاف ورزی کے مترادف ہے۔