خیبرپختونخوا میں بارشیں، چھتیں، دیواریں گرنے سے 12 افراد جاں بحق، 15 زخمی

خیبر پختونخوا میں گزشتہ 24 گھنٹوں کے دوران ہونے والی موسلادھار بارشوں اور فلش فلڈ نے بھاری جانی و مالی نقصان پہنچایا ہے۔ بارشوں کے باعث مکانات کی چھتیں و دیواریں گرنے اور سیلابی ریلوں میں بہہ جانے سے اب تک 12 افراد جاں بحق جبکہ 15 افراد زخمی ہو چکے ہیں۔ پی ڈی ایم اے (PDMA) کے مطابق جاں بحق ہونے والوں میں 6 مرد، 5 بچے اور ایک خاتون شامل ہیں، جبکہ زخمیوں میں 8 مرد، 2 خواتین اور 5 بچے شامل ہیں۔ بارشوں اور سیلابی صورتحال کی وجہ سے صوبے بھر میں مجموعی طور پر 14 مکانات کو نقصان پہنچا، جن میں سے 13 مکانات کو جزوی جبکہ 1 گھر مکمل طور پر منہدم ہو گیا۔ یہ حادثات پشاور، خیبر، مردان، بونیر، باجوڑ، چترال لوئر، ایبٹ آباد، مانسہرہ، تورغر اور کرم جیسے اضلاع میں پیش آئے۔

ڈی جی پی ڈی ایم اے نے تمام متاثرہ اضلاع کی انتظامیہ کو امدادی سرگرمیاں تیز کرنے اور متاثرین کو فوری امدادی سامان و معاونت فراہم کرنے کی ہدایت کی ہے۔ پی ڈی ایم اے کے مطابق، اگرچہ اس وقت صوبے کے تمام دریاؤں اور ندی نالوں میں پانی کا بہاؤ معمول کے مطابق ہے، تاہم تیز بارشوں کا یہ سلسلہ 23 جولائی تک وقفے وقفے سے جاری رہنے کا امکان ہے۔ خطرناک صورتحال کے پیشِ نظر پی ڈی ایم اے نے ضلعی انتظامیہ کو ہائی الرٹ پر رکھا ہوا ہے اور عوام سے اپیل کی ہے کہ وہ غیر ضروری سفر سے گریز کریں، حساس سیاحتی مقامات کا رخ نہ کریں اور حکومتی ایڈوائزری پر سختی سے عمل کریں۔