خیبرپختونخوا اور بلوچستان میں حالات خراب، بند کمروں کے فیصلوں کو نہیں مانتے: سہیل آفریدی

وزیراعلیٰ خیبر پختونخوا سہیل آفریدی نے کہا ہے کہ خیبر پختونخوا اور بلوچستان میں امن و امان کی صورتحال انتہائی تشویشناک ہو چکی ہے اور صوبائی حکومت بند کمروں میں کیے جانے والے فیصلوں کو کسی صورت قبول نہیں کرے گی۔ سابق وزیراعلیٰ علی امین گنڈاپور کی رہائش گاہ الامین ہاؤس میں پریس کانفرنس سے خطاب کرتے ہوئے انہوں نے درا زندہ میں ہونے والے بزدلانہ خودکش دھماکے کی سخت الفاظ میں مذمت کی۔ سہیل آفریدی کا کہنا تھا کہ ریاست اور پاکستان کے خلاف جو بھی ہتھیار اٹھائے گا وہ دہشت گرد ہے، اور اس جنگ میں صرف عام شہری ہی نہیں بلکہ سیکیورٹی فورسز کے جوان بھی اپنی جانوں کے نذرانے پیش کر رہے ہیں۔

وزیراعلیٰ نے بتایا کہ امن و امان کے قیام کے لیے صوبائی حکومت نے پولیس کو 35 ارب روپے کے فنڈز فراہم کیے ہیں، تاہم عوام کو اعتماد میں لیے بغیر صوبے میں پائیدار امن قائم نہیں ہو سکتا۔ انہوں نے کہا کہ دہشت گردی کی اس لہر میں شہید ہونے والوں کے لواحقین کو شہید پیکیج دیا جائے گا۔ سہیل آفریدی نے وفاق پر سخت تنقید کرتے ہوئے کہا کہ ادائیگی کے باوجود خیبر پختونخوا کو بکتر بند گاڑیاں فراہم نہیں کی جا رہیں، وفاق جہاز خرید رہا ہے جبکہ خیبر پختونخوا اپنے شہداء کے جنازے اٹھا رہا ہے۔ انہوں نے مطالبہ کیا کہ وفاق فوری طور پر صوبے کو مطلوبہ بکتر بند گاڑیاں فراہم کرے۔